MARAGETÃ MAATOREJXEÃWA
Apyãwa xapyykawa, ywy re xapyykãwa, ywy rerekakatoawa
à te’omara apamatata a’e ramõ kwakaj wetepe axe’apeap wekawo, marygãto ekwe akwaxiat inoga xere ywy paragetã, ikome’owo ymywararera apyãwa ataawera, ywy re xapyykawa re, inoga ywyrape pe ikwaxiata xereapito’akwera agy we. Tajxak we a’ygy ota iapyretarowo te’omara ywy re xapyykaawa ranõ. Marygãto mi xane apyãwa ramõ xixapyyk xerekawo ywy rerekakatoawa re. A’e ramõ aoxekatoete awa’yaowera axema’ewo a’yao pewe ywy re xapyyka. A’e tana ekwe ã maira kapitawoho agy xiawapi irekawo xerexewi, ikwaxiata ekajmo ywyrape ee xerekawo. ‘y a’e ramõ maira re xanexapyykawa ywyrape pe xe, ywyrape a’e ramo ‘y xanero’ywete. Axekwe a’e ramõ ‘y tawaxara ramõ naxikaj xeretajpe xe, maira ropi mi ka y xiata xerekwapa, imamyrowo maira agy xerepyroara agy ywy rerekakatoawa re. A’e ramõ mi amowera maira xanepyyro akwapa xaneywy re. A’e ramõ xanexapyyka napawi maira wi, niwaxaj maira axaxywo’owo xaneree tawaxara ramõ. A’e rereewi mõ ta xane tawaxara ramõ xikyyxe ixowi ranõ. aoxekato ramõ iawaxata xerexee maira agy, xerexe’ega ixope ixe’egimo iawapiwo xere ywy re xe’egaiwa ramõ. A’e ramõ a anog emanyn ikwaxiata ywyrape xerexaope ywy re xapyykawa.